نوچەنێت-یۆرۆ نیوز
سەردانەکەی عادل عەبدولمەهدی، سەرۆکوەزیرانی عێراق، بۆ سعودیە و پێشوازیکردنی تایبەتی لە لایەن ریازەوە، سەرنجی زۆریەک لە ناوەندی سیاسی و ئاکادیمیەکانی بۆ لای خۆی راکێشاوە.
رێککەوتنەکانی بەغدا و ریاز، سەبارەت بە بوارە ئەمنی و هەواڵگریەکان خاڵێکی سەرنجڕاکێشی ئەم سەردانەی عادل عەبدولمەهدی بۆ ریاز بوو.
لەم بارەوە، نادر ئینتسار، مامۆستای زانستە سیاسییەکان لە زانکۆی ئالابامای ئەمریکا دەڵێت: گرنگترین پەیامی ئەم سەردانە ئەوەیە، کە عێراق دەیهەوێ لە دوای چەندین ساڵ شەڕی ناوخۆ و قەیرانی سیاسی، بگەرێتەوە بۆ ناو هاوکێشە سیاسییەکانی ناوچەکە و بە تایبەت لە رۆژهەڵاتی ناوەڕاست و کەنداو دەوری جارانی خۆی بگێڕێت.
ئەم شارەزا ئێرانیە پێی وایە، کە عێراق لە ئیستادا پێویستی بە سەرمایە و وەبەرهێنانی دەرەکی هەیە و ئاسایشە، کە سعودیە بە باشی خوێندنەوەی بۆ دۆخەکە کردووە.
بە گوتەی پرۆفیسۆ ئینتسار، ئێران بە بەراورد لە گەڵ سعودیە، توانای وەبەرهێنانی لە عێراق نییە و ئەمەش وای کردووە، کە ریاز بەرەبەرە پێگەی سیاسی و بازرگانی خۆی لە عێراق پتەوتر بکات.
