نوچەنێت
سەرۆکوەزیرانی عێراق لە بەیاننامەیەکدا سەرەخۆشیی لە گەلی کورد دەکات دەڵێت “لاپەڕەیەکی رەشە لە لاپەڕە رەشەکانی رژێمی بەعسی لەبەرامبەر گەلی کورد و لە بیر ناکرێ”.
ئەمڕۆ شەممە ١٦-٣-٢٠١٩، عادل عەبدولمەهدی، سەرۆک وەزیرانی عێراق لە بەیاننامەیەکدا رایگەیاندووە، کارەساتی کیمیابارانکردنی هەڵەبجە، ویژدانی مرۆڤایەتی هەژاند و لاپەڕەیەکی رەشە لە لاپەڕە رەشەکانی رژێمی بەعسی لەبەرامبەر گەلی کورد و لەبیر ناکرێ.
سەرۆکوەزیرانی عێراق، وێڕای سەرەخۆشیکردن بەبۆنەی ساڵوەگەڕی ٣١ـەمینی کیمیابارانکردنی هەڵەبجە لە گەلی کورد، رایگەیاند ”هەڵەبجە هەر بە هێمای دڕندەیی دیکتاتۆریەت دەمێنێتەوە و گەل مکوڕتر دەکا لە سزادانی جەلاد و تاوانبارانی کیمیابارانکردنی هەڵەبجە.
عەبدولمەهدی، شەهیدانی هەڵەبجە بە سەربەرز و نەمر و کەسوکاری ئەو شەهیدانەش بە مایەی شانازی ناو دەبات و سەرەخۆشی لە گەلی کورد دەکات، لە بەرامبەر قوربانیدانەکانی.
رۆژی ١٦ـ٣-١٩٨٨، حکومەتی عێراق، بە چەکی کیمیاوی، شاری هەڵەبجەی بۆردومان کرد و بەهۆیەوە جگە لە وێرانبوونی شارەکە، زیاتر لە پێنج هەزار هاوڵاتی، کە زۆربەیان ژن و منداڵ بوون، شەهید بوون.
