نوچەنێت–یۆرۆ نیوز
برایان هوک، بەرپرسی کاروباری ئێڕان لە وەزارەتی دەرەوەی ئەمریکا دەڵێت، گەمارۆ و گوشارەکانی سەر ئێڕان تا داڕمانی ئابوری ئەم وڵاتە بەردەوام دەبێت.
برایان هوک بە ئاماژەدان بە هەوڵەکانی نیکی هێلێ، باڵیۆزی پێشووی ئەمریکا لە نەتەوەیەکگرتووەکان بۆ خستنەڕووی بەرنامەی موشەکی ئێڕان، دەڵێت: مەترسی بەرنامەی موشەکی ئێڕان تا دێ زیاتر دەبێت.
بە گوتەی برایان هوک، دەستوەردانی سەربازی ئێران لە ناوچەکە رووی لە زیاد بوونە و ئەم وڵاتە بەشێوەی رابردوودا و بە پێچەوانەی بڕیارەکانی ئەنجونی ئاسایش، چەک و تەقەمەنی رەوانەی وڵاتانی دیکەی جیهان دەکات.
بەرپرسی دۆسیەی ئێڕان لە وەزارەتی دەرەوەی ئەمریکا دەشڵێت “پشتیوانی موشەکی ئێران لە حووسییەکانی یەمەن، تاڵیبان لە ئەفغانستان، حزبوڵڵا لە لوبنان و رژێمی بەشار ئەسەد وای کردووە، کە ئەم وڵاتانە رووی ئارامی و ئاشتی بە خۆوە نەبینن.
برایان هوک بە ئاماژەدان بە هەڕەشەکانی ئێران بۆ داخستنی گەرووی هۆرمۆز جەخت دەکاتەوە، ئەمریکا رێگە بە داخستنی ئەم ریڕەوە نادات.
