ڕاپەڕین و ئاکامەکانی
پردی پەڕینەوەی بەعسی کوردی و ئاوا بوونی بەعسی عەرەبی
ئارام ئەحمەد / هۆڵەند
ڕاپەڕینی جەماوەری خەڵکی کوردستان، هەڵگەڕانەوەو شۆڕشێک بوو دژی داگیرکاری و دیکتاتۆریەت و ئیستیبداتی ڕژێمی بەعس، خۆ بەخۆ لە هەناوی سیاسەتی شەڕی ئێران و عێراق و پەلاماری ڕژێمی بەعس بۆ سەر کوێت و، ڕاپەڕینی شیعەکانی ناوەڕاست وخواری عێراقەوە سەرچاوەی گرت، بەرهەمی کشانەوەی هێزەکانی ڕژێمی دیکتاتۆری بەعس بوو، بۆ سەرکوتکردنی بزوتنەوەی شییعەکان، کوردستان هێزێکی ئەوەندە زۆری تێدا نەما،بەو پێیەی گەڕانەوەی لەشکری عێراق لە کوێتداو، لەو وادەیەدا کە بۆیان دانابوو، لێدانی دەست ئەنقەستی ئەم لەشکرە لەلایەن لەشکری ئەمریکاوەو هاوپەیمانەکانی و قەتڵوعامکردن و لەبەر یەک هەڵوەشانی، گوڕو تین وهیوایەکی باشتری دابە خەڵکی کوردستان، کە تۆڵەی دەیان ساڵەی خۆی لەو ڕژێمە بکاتەوە، کەهەرچی چەوسانەوەو سێدارەو ئەنفال و کیمیباران هەیە بەسەریدا هێنابووی.
مەسعود بارزانی دوای ڕاپەڕین دەڵێت “وەختێک میللەت ڕابوو، بەرەی کوردستانی بڕیاری دا کە پشتیوانیان بکات”، بەڵام ئێستا هەرکەسەیان هەڵدەستێ خۆی دەکات بە قارەمان و بڕیاردەری ڕاپەڕین و قسەکانی خۆیان بێردەچێتەوە، دەکەونە خۆ گیڤکردنەوەو پێچانەوەی درۆو دەلەسەی وا، منداڵیش بە بیستنی شەرمەزار دەبێت.
خواو مێژوو گەلی کوردیش دەزانن، کە ڕاپەڕینمان کرد، یەکێتی و پارتی و هەموو بەرەی کوردستانیمان لەگەڵ نەبوو، هەرچەندەخەڵکانێکی کەم هەوادارانی یەکێتی هەبوون، وەلێ پارتی بە خەونیش بەشداری نەکردوەو هاتۆتە سەر حازری، هەرچی هێزی پێشمەرگەیشە سێ ڕۆژ دواتر گەڕانەوە سلێمانی و تەنها تەقەو تۆقێکی کەم لە ئەمنەکەدا مابوو، بەڵام ئەوەتا بیست ودوو ساڵە یەکێتی و پارتی ئەم بۆنەیەشیان قۆرخ کردوەو کردویانە بە هی خۆیان، لە کاتێکدا بەرهەمی گەلی کوردستانەو هیچ کەسێک و دەستە تاقم و حیزبێک مافی ئەوەی نییە، خۆیی پێوە بابدات و بیکاتە موڵکی خۆی، بەڵام تەسەوری داگیرکاری و هەمان ئەقڵی بەعسیانەی یەکێتی و پارتی، ئەمەشیان بە خوت و خۆڕای لە خۆیان مارە کردوە، یان پارچە پارچەیان کردوەو کردویانە بە شار شارێنەو ناوچەگەری.
هەر لە دوای ڕاپەڕینەوە، بە گرتنە دەستی دەسەڵات لە لایەن چەتەکانی شاخەوە، ئاراستەکانی ڕاپەڕین پێچەوانە بونەوە، ئاکامەکانی ڕاپەڕین بوون بە هیچ، سێبەری دیکتاتۆری بەعسی لاچوو، دوو سێبەری دیکتاتۆری یەکێتی و پارتی، بەهەمان دیدگاو ئەقڵیەتی بەعسەوە، هاتنە جێگای و لە بەعس خراپتر کەوتنە وێزەمان، ئەوەی کەلە هەڵەبجەدا، پێنج هەزار ئینسان بە دەستی بەعسیەکان کیمیاباران کران و شەهید کران، یەکێتی وپارتیش لە شەڕە ناوخۆیەکانیاندا دوانزە هەزارو پێنچ سەد کەسیان کوشت و بە کوشت دا، هەزاران ژنیان کوشت، ئەوەی کە بەعس بۆی نەکرابوو ئەمان وەک هەوادارێکی دەستپاک بۆیان کرد، هەر لەچەوسانەوەی بێ ئامانەوە، تا تیرۆری بێئەژمارو فڕاندن و کوشتن، سێدارەو شاردنەوە، دزینی سەروەت و سامانی گشتی بۆ خۆیان، پاشەکشە پێکردن ولە گۆڕنانی ئەو تۆزە ئازادی ودیموکراسییەی چەند ڕۆژی سەرەتاکانی ڕاپەڕین بەدەست هاتبوو، تەعداو ئابڕوتکاندن، سوتان وکاولکاری، تا ئەم ساتەوەختەش ئیستبدای بەعس ئاسای یەکێتی و پارتی و دیکتاتۆریەتی ئەم دوو باندە مافیایە، تەوای کۆمەڵگا وێران دەکاو ئیسقانەکانی دەهاڕێت، ڕاپەڕین لە زهنی منداو لە واقعی ئەم تەمەنەی دوای ڕاپەڕین، تەنها پەرینەوەیەک بوو، لە ئەقڵیەتی بەعسی عەرەبییەوە، بۆ هێنانی ئەقڵی بەعسی کوردی، لەمە بەدەر تەواوی ماناکانی خۆی لە دەستداوەو هیچ بەرهەمێکی نەبوو بۆ کۆی کۆمەڵگاو، تەنها بووە دۆلارو دەسەڵات بۆ سەرانی یەکێتی و پارتی وهیچی تر.
مانادانەوە بە ڕاپەڕین
ڕاپەڕین و یادەکانی سەیران وسەما و هەڵپەڕکێ نییە، ئەمەی هەوادارانی پوڵخۆری یەکێتی و پارتی دەیکەن، پانتاییەکە لە ساختە، بۆ خاڵی بونەوەی پەیامەکانی ڕاپەڕینە، لە ماناو مەغزاکانی خۆی، بۆ بێ ئەهمیەتکردن و بە مۆدێلکردنێکە وەک جەژنێک، لە کاتێکدا یادی ڕاپەڕین و خودی ڕاپەڕینیش لە هەناوی خۆیدا کۆمەڵێ فۆڕمی هەڵگرتوە، کە هەمیشە دەمێنێ و ئامادەگی هەیە بۆ ڕاپەڕینی ترو شۆڕش و هەڵگەرانەوە، بە جەژنکردنی ڕاپەڕین لەلایەن دەسەڵاتی دیکتاتۆریانەو فاشیانەی یەکێتی وپارتیی ترس وتۆقین و دڵەڕاوکێیە لە ڕاپەڕینێکی نوێ ڕوو بە خۆیان.
ئەوان دەیانەوێت پێمان بڵێن، کە ئێمەش پشتیوانانی ڕاپەڕینین، یان زۆرجار واوەتر درۆدەکەن و دەڵێن ئێمە کردمان، دەیانەوێت بڵێن، ڕاپەڕین تەواو، ئەوە ڕوداوێکی مێژوویی بوو دژی بەعس، ئێمە بەعسی نین و ئیتر کورد پپێویستی بە ڕاپەڕین نییەو کۆتایی هاتوە و ئەمە مێژویەکی نوێیە، پیاوە کێویەکان دیموکراسی سادر دەکەن بۆ ڕۆژەهەڵاتی ناوەڕاست وکۆمەڵی قسەی قۆڕی تر، خەیاڵدانی سەرانی مافیای یەکێتی وپارتی بەم قسە پوچانە سواخدراوەو بێئاگا لەوەی کە ڕاپەڕین لای زۆربەی خەڵکی کوردستان، تەنها شای ولۆغانی درۆزنانە نییە، هەڵکردنی ڕەنگی پیسی سەوزو زەرد نییە، بەڵکو وەرگرتنی دەرس و تەجروبەیەکە بۆ خۆ ڕێکخستن بۆ ڕاپەڕینێکی تر، دژی بەعسی کوردی کە لە ئەقڵیەتی سەرانی یەکێتی و پارتیدا ئامادەگی هەیە، ڕاپەڕین بە هەموو ماناو پێوەرێک، بەدیوەکەی تریدا، درێژەی هەیەو کەس ناتوانی خاڵی بکاتەوە لەماناکانی خۆی، کە هەڵگەڕانەوەو شۆڕشە دژی سەرکوت، ئیستبدادو ناعەدالەتی، چەوسانەوەو بێدادی،ڕاپەڕین هەمیشە لەگەڵ دوژمنە تازەو کۆنەکانی خۆیدا دەجەنگێت، دەرئەنجامەکانی دەبێت کۆمەڵگایەکی عادل و ئازاد و بێ چەوسانەوە بێت، تا ئەم ڕۆژاگارە بەدینەیەت، ڕاپەڕین هەمیشە بوونی هەیەو لەناو هزری خەڵکدا باڵا بەرزە، یەکێتی وپارتی ئەو کارەکتەرانەن کە ڕابردو ئێستاشیان وێران کردوە، بەعسین ولەسەرچەمکی بێدادی وچەوسانەوە ودیکتاتۆری ڕاوەستاوون، لێرەوەیە یادی ڕاپەڕین تیژکردنەوەی هەمان نەعرەتەو هاوارە، کە بەرامبەر بەعسیەکان کردمان و ئێستایش بەرامبەر بەعسە نوێکان دەیکەین.
دەزانین ئاکامەکانی ڕاپەڕین، یەکێتی وپارتی بردیان، هیچی بۆ ئازادی ودیموکراسی بەرهەم نەهێنا، هیچی بۆ خەڵکی کوردستان بەرهەم نەهێنا، ئاکامگەلێکی فاشیل و دۆراو بوو، یان باشترە بڵیم یەکێتی وپارتی بردیان و خەڵکی ڕاپەڕیوو دۆڕاندیان، لە ڕوانگەی خەڵکی کوردستانەوە، پانتاییەک لە ناشیرینی و دزی وتاڵانی بەرهەم هێنا، تەنها پردی پەڕینەوەی بەعسی عەرەبی بوو بۆ بەعسی کوردی، کۆمەڵێ مافیای بەرهەمهێنا، کە بیست ودووساڵە بەر بونەتە گیان خەڵک و هەرچی هەیە بۆ خۆیان بردوە.
ماناکانی ڕاپەڕین بۆ ئێمە تەواو نەبوە، نە یادەو نە هەڵپەڕکێ ونە شیرینی خواردن، بەڵکو توڕە بون و هەستانەوەو پەیمان نوێکردنەوەیەکە بۆ ڕاپەڕینێکی تر بە ڕووی بەعسییە کوردەکاندا، حورمەتگرتنی ڕاپەڕین و شکۆی شەهیدەکانی تەنها بە درێژەدان بەڕێگاکانیان فەراهەم دەبێ، دژی داگیرکاری دەرەکی وناوخۆیی، دەرەکی واتە داگیرکەران و، ناوخۆیی واتە یەکێتی وپارتی، شەهیدان وڕۆژانی ڕاپەڕین تەنها بەوە دەپێورێت، کە کاڵنەبێتەوەو درێژە پێدەربێت بۆ ڕاپەڕینێکی نوێ، دژی فاشیەتی حیزبی یەکێتی وپارتی،هەموو شەهیدانی ڕاپەڕینیش تەنها بەم ئومێدەوە گیانی خۆیان بەخشی، بۆ ئازادی و سەربەرزی، کۆمەڵگایەکی تەندروست و خۆشگوزەران، کۆمەڵگایەک کە عەدالەتی کۆمەڵایەتی مانایەکی هەبێ و چەوسانەوەی ئینسان لە لایەن ئینسان وڕژێم و بنەماڵە درندەکانەوە ئاسەواری نەمێنێت، تا بەدیهاتنی ئەو ڕۆژە ڕاپەڕین درێژەی هەیە، لێرەوەیە ڕاپەڕین بۆ خەڵک هیچی بەدەست نەهێناو بۆ دوو بنەماڵە هەموو شت، لێرەوەیە ئێمە دۆراندمان وئەوان بردیانەوە، لێرەوە بوو ڕاپەڕین بۆ ئێمە ماناکانی خۆی لەدەست داو خاڵی بوو، بۆ ئەوان دەسەڵات وژیانی شاهانەو ملیارد دۆلار، مانا دانەوە بە ڕاپەڕین، خۆ سازدانە بۆ ڕاپەڕینێکی ترو درێژە دان بە ڕێبازی شەهیدان تا پڕبوونەوەی ماناکانی خودی ڕاپەڕین،تا بەدەستهێنانی ئازادی و ژیانێکی شایستە.
