نوچەنێت: تایبەت
ئەندامێکی ئەنجومەنی نوێنەرانی عێراق رایدەگەیەنێت، فراکسیۆنی پارتی هەوڵدەدات لەگەڵ لایەنەکان بۆ دیاری کردنی یەک کاندید بۆ سەرۆککۆمار رێکبکەون.
لە دوای رووخانی رژێمی بەعس و هاتنەسەرکاری پێکهاتە جیاوازەکان بۆ سەر حوکم، پۆستی سەرۆککۆماری عێراق بۆ کورد دیاری کراوە و تا ئێستاش ئەو پۆستە لەلای یەکێتی نیشتمانی کوردستان بووە، بەڵام بۆ ئەم خولە، پارتی دیموکراتی کوردستان، بە ئیستحقاقی خۆی دەزانێ و کاندیدی بۆ ئەو پۆستە دیاری کردووە.
لە لێدوانێکی تایبەت بەنوچەنێت، د. مەیادە نەجاڕ، ئەندامی پەرلەمانی عێراق لە فراکسیۆنی پارتی، بارەی کاندیدەکانی سەرۆککۆمارەوە رایگەیاند: لەبارەی دیاری کردنی کاندیدێک لە گەڵ لایەنەکان لە گفتوگۆداین، بۆ ئەوەی رێککەوتن هەبێ لەسەر یەک کاندید.
مەیادە نەجاڕ دەشڵێت، پارتی پێیوایە لەناو فراکسیۆنە کوردستانییەکان هەڵبژاردن بکرێت، پێش کۆبوونەوەی پەرلەمان و کاندیدێک دیاری بکرێت. بەڵام لە لایەن لایەنەکانی دیکەی کوردەوە رەتکراوەتەوە.
ئەو ئەندام پەرلەمانەی عێراق ئاماژەی بەوەش کرد، کە کاندیدی بەهێز د. فوئاد حوسێن ـە و دوای ئەو د. بەرهەم ساڵح ـە.
