نوچەنێت-ئاژانسەکان
مایک پەمپیۆ، وەزیری دەرەوەی ئەمریکا، لە میانەی گوتارێکدا بە ناونیشانی “پشتیوانی لە خەڵکی ئێران”، کە لە کتێبخانەی رێگان لە ئەیالەتی کالیفۆرنیا ئەنجام درا، جارێکی دیکە پشتیوانی خۆی بۆ ویست و داخوازی خەڵکی ئێران دووبارە کردەوە.
تەوەرە سەرەکیەکانی ئەم گوتارەی پەمپیۆ، گەندەڵی لە کۆماری ئیسلامی، گەمارۆکان، مافەکانی مرۆڤ و سیاسەتەکانی واشنتۆن بەرامبەر بە ئێران بوو.
وەزیری دەرەوەی ئەمریکا، رەخنەی لە گەندەڵی کۆماری ئیسلامی گرت و گوتی: رژێمی ئێران ئێستاش نیازی هەناردەکردنی شۆڕشەکەی بۆ دەرەوەی سنوورەکان هەیە و بۆ ئەم مەبەستە گەشەی ئابوری، ئازادییەکان و بەرژەوەندی هاوڵاتیانی خۆی کردۆتە قوربانی.
بە گوتەی سەرۆکی دەزگای دیپلۆماسی ئەمریکا، حکومەتی ئێران زیاتر لەوەی شێوەی دەوڵەت بدات، زۆرتر لە مافیا دەچێت.
پەمپیۆ گوتیشی: داهاتی ئێران لە دوای رێککەوتنی ئەتۆمی بەزر بووەوە و ئەم داهاتەش تەرخان کرا بۆ کاروباری تیرۆریستی.
وەزیری دەرەوەی ئەمریکا، بە ناوهێنانی بەرپرسانی باڵای کۆماری ئیسلامی، بە تایبەت رابەری کۆماری ئیسلامی و سەرۆکی دەزگای دادوەری، ئەوانی بە فیڕۆدان و کۆکردنەوەی سامان و دارایی تۆمەتبار کرد و جەختی کردەوە، کە سامانی ئێڕان بۆ سوپای پاسداران و حزبوڵڵای لوبنان و رژێمی بەشار ئەسەد تەرخان دەکرێت.
