نوچەنێت: حۆڕییەت
رۆژنامەی حۆڕییەت لە هەواڵێکدا رایگەیاند، تورکیا و ئەمریکا گفتوگۆکانی خۆیان لە بارەی خولی نوێی گەمارۆکانی سەر ئێران دەستپێکردووە.
یاریدەدەری وەزارەتی خەزێنەداری ئەمریکا، وێڕای پشتڕاستکردنەوەی گفتوگۆکانی نێوان ئەنقەرە و واشنتۆن، سەبارەت بە گەمارۆ و ئابڵۆقەکانی سەر ئێران، دەڵێت: دەوڵەتی تورکیا و کۆمپانیاکانی ئەم وڵاتە، دەبێ ئاگاداری کاردانەوە و دەرهاویشتەکانی بازرگانی لە گەڵ ئێران بن. هەر بۆیەش گفتوگۆکان سەبارەت بە گەمارۆکانی سەر ئێران لە گەڵ تورکیا بەردەوام دەبێت و لەم بارەوە ئاڵۆڕی زانیاری و بیروڕا دەکەن”.
رۆژنامەی حۆڕییەت جەخت دەکاتەوە، کە بەرپرسانی وەزارەتی خەزێنەداری ئەمریکا لە گەڵ ژمارەیەک لە بەرپرسانی وەزارەتی دەرەوەی ئەمریکا و بانکی ناوەندی تورکیا و هەروەها چەندین کۆمپانیای گەورەی ئەم وڵاتە گفتوگۆیان کردووە.
هاوکات وەزارەتی دەرەوەی تورکیا جەختی لە سەر گرنگی دراوسێتی لە گەڵ ئێران کردۆتەوە و رایانگەیاندووە، کە پەیوەندییە بازرگانیەکانی تورکیا و ئێران لە گەڵ ئەوەی گرنگن، بەڵام دەبێ بۆچوونی لایەنی ئەمریکیش وەربگرن.
