نوچەنێت:تایبەت
بەڕێوەبەری پۆلیسی قەزا و ناحیەكانی كەركوك رایدەگەیەنێت، گروپی تیرۆرستی داعش لە سنورەکانی کەرکوک و دەوروبەری، مەترسین بۆ سەر ژیانی هاوڵاتیان.
لە دوای روداوەكانی ١٦ی ئۆكتۆبەری ساڵی ڕابردوو، دۆخی ئەمنی کەرکوک ناجێگربووە و جارێکی تر لەسنووری كەركوك داعش سەری هەڵداوەتەوە. لەم چەند رۆژرەدا چەندجارێک، هێرشیان کردە سەر هێزە عێراقییەكان و گوندەكان. كردەوەی تیرۆریستی ئەنجام دەدەن.
لە لێدوانێکی تایبەت بەنوچەنێت، عەمید سەرحەد قادر بەڕێوەبەری پۆلیسی قەزا و ناحیەكانی كەركوك، لە بارەی جموجۆڵەکانی داعش لەسنوری کەرکوک رایگەیاند”گروپی تیرۆرستی داعش، لەسنورەکانی کەرکوک و دەوروبەری دروستبووەتەوە و مەترسی بۆ سەر ژیانی هاوڵاتیانی سنورەکە درووستکردووە. جاری وا هەبووە دوو چەکداری داعش، چوونەتە پارێزگایەکەوە و باری ئەمنی ئەو پارێزگایەیان تێکداوە، ئێستا کە بە هەزاران چەکداری داعش لەو سنورەدایە، بەدڵنیاییەوە جێگای مەترسییە”.
سەبارەت بەو سنورانەی، کە داعش جموجۆڵی تێدادەکات سەرحەد قادر، گوتی”لەسنوری قەزای حەویجە، قەزای داقوق و قەزای دوبز جموجۆڵیان زۆرە، ئەمڕۆ ئۆتۆمبێل لە کەرکوک تەقیوەتەوە، دوانیوەڕۆی ئەمڕۆش چەکدارانی داعش چوونەتە گوندەکانی کاکەیییەکان و، کۆمەڵێک مەڕو ماڵاتی گوندنشینەکانیان بردووە”.
بەڕێوەبەری پۆلیسی قەزا و ناحیەكانی كەركوك، ئاماژە بەوەش دەکات، جگەلەوەی داعش هێزی عەسکەرییان لەسنورەکەدا هەیە. ئێستا شانە چەکدارەکانیشیان لە ناو شاردا دەستیان کردووە بەکاری تیرۆرستی، بۆیە بوونی ئەوان لەسنورەکە هەڕەشەیە بۆسەر ژیانی هاوڵاتیان.
