نوچەنێت
سەرۆکوەزیرانی هەرێمی کوردستان، بەبۆنەی کۆچی دوایی وەزیری پێشووی دارایی و ئابووری هەرێمی کوردستان، پرسەنامەیەکی ئاراستەی بنەماڵەکەی کرد.
ئەمڕۆ پێنجشەممە 21-6-2018، نێچیرڤان بارزانی، سەرۆكوەزیرانی هەرێمی كوردستان، لە پرسەنامەیەكەدا بەبۆنەی كۆچی دوایی بایز تاڵەبانی، وەزیری پێشووی وەزارەتی دارایی و ئابووری حكومەتی هەرێمی كوردستانه‌وه، پرسە و سەرەخۆشی لە بنەماڵەكەی کرد و رای گەیاند، کە یادی كۆچكردوو و سەرڕاستی و قسەخۆشەكانی هەمیشە لەیادی ئەواندا دەمێننەوە.
سەرۆكوەزیرانی هەرێمی كوردستان، ئەوەشی خستووەتەڕوو، کە لە كاتی پێكەوە كاركردنیاندا، شێخ باییز، نموونەی كەسێكی شارەزا و سەرڕاست بوو. هەروەها قسەخۆشەكانی هەمیشە گەرماییەكی زیاتری دەدایە كاركردنێكی گونجاو و پڕ لە لێكگەیشتن، لە هەمانكاتدا ژیانی ڕابردووشی پڕبوو لە تێكۆشان و دڵسۆزی بۆ شۆڕش و گەلی كوردستان.
دەقی پرسەنامەکە:
بۆ بنەماڵەی خوالێخۆشبوو شێخ باییز تاڵەبانی،
بەداخەوە ئەمڕۆ كەسایەتی و وەزیری پێشووی ئابووری و دارایی حكومەتی هەرێمی كوردستان، خوالێخۆشبوو شێخ باییز تاڵەبانی، كۆچی دوایی كرد. بەوبۆنە خەمناكەوە پرسە و سەرەخۆشیی خۆم و هاوكارانم لە ئەنجومەنی وەزیران ئاراستەی ئێوەی بەڕێز دەكەم و لە خوای مەزن داواكارین جێگەی بەهەشت بێت.
لە كاتی پێكەوە كاركردنماندا، شێخ باییز نموونەی كەسێكی شارەزا و سەرڕاست بوو لە كاركردندا، هەروەها قسەخۆشەكانی هەمیشە گەرماییەكی زیاتری دەدایە كاركردنێكی گونجاو و پڕ لە لێكگەیشتن لەگەڵ شێخ باییزدا، لە هەمانكاتدا ژیانی ڕابردووشی پڕبوو لە تێكۆشان و دڵسۆزی بۆ شۆڕش و گەلی كوردستان.
سەرڕاستی و قسەشیرینیی شێخ باییز تاڵەبانی، وەك یادگارەكانی كەسێكی دڵسۆز لە یادی ئێمەدا هەمیشە بە زیندوویی دەمێننەوە.
نێچیرڤان بارزانی
سەرۆكوەزیرانی هەرێمی كوردستان
21-6-2018
