نوچەنێت
جێگری سەرۆكی پارتی دیموكراتی كوردستان، دوای راگەیاندنی ئەنجامی هەڵبژاردنی پەرلەمانی عێراق و سەركەوتنی لیستی پارتەکەی، پەیامی سەركەوتنی بڵاوكردەوە و پیرۆزبایی لە هەموو ئەندامانی حزبەکەی كرد.
نێچيرڤان بارزانى، جێگری سەرۆكی پارتی دیموكراتی كوردستان، لە پەیامەكەیدا داوای یەكڕیزی لە هەموو لایەنە سیاسییەكانی كوردستان دەكات، هەروەها جەخت لەسەر دروستكردنی حكومەتێكی هاوبەشی تازەی عێراقی دەكاته‌وه به‌پێى بنەمای تەوافوق و لەسەر بنچینەی هاوبەشییەكی كارای كورد وەك نەتەوەی هاوبەش لە عێراقدا.
جێگری سەرۆکی پارتی دیموکراتی کوردستان بە ئاماژەدان بەوەی ئەو سەركەوتنە دیموكراسییە گەورەیە لەو بارودۆخە هەستیارەدا بۆ پارتی زۆر واتادارە، رایدەگەیێنێت: “بەرهەمی خەباتی پارتی و بەرگريی پارتییە لە قەوارەی هەرێمی كوردستان و ئامانجەكانی گەلی كوردستان و بەرهەمی خەباتی بەردەوامی جەنابی سەرۆك مەسعود بارزانی-یە لەپێناو ئامانجە نەتەوەیی و نیشتمانییەكان و پاراستنی دەستكەوتەكانی گەلی كوردستاندا”.
دەقی پەیامی سەركەوتن و پیرۆزبایی نێچیرڤان بارزانی:
جەماوەری خۆشه‌ويست و تێكۆشەری پارتى،
ئەم سەركەوتنە سه‌ره‌تا له خانه‌واده‌ى سه‌ربه‌رزى شه‌هيدان و له پێشمه‌رگه قاره‌مانه‌كان، ئينجا لە هەموو ئەندام و لایەنگران و جەماوەری پارتی دیموكراتی كوردستان و تێكڕاى گه‌لى كوردستان پیرۆز دەكەم. ئەم سەركەوتنە دیموكراسییە گەورەیە لەو بارودۆخە هەستیارەدا بۆ پارتی زۆر واتادارە. بەرهەمی خەباتی پارتی و بەرگريی پارتییە لە قەوارەی هەرێمی كوردستان و ئامانجەكانی گەلی كوردستان و بەرهەمی خەباتی بەردەوامی جەنابی سەرۆك مەسعوود بارزانی یە لەپێناو ئامانجە نەتەوەیی و نیشتمانییەكان و پاراستنی دەستكەوتەكانی گەلی كوردستاندا.
لە ماوەی بانگەشەی هەڵبژاردندا، مەكتەبی سیاسی، ئەنجومەنی سەركردایەتيی پارتی، ئه‌نجومه‌نه‌كانى سه‌ركردايه‌تيى پارتى له پارێزگاكان، مەكتەبەكانی پارتی، ڕێكخراوه جه‌ماوه‌رى و پيشه‌ييه‌كان، هەموو ئەو هەڤاڵانەی سەرپەرشتيی كەمپینەكانی هەڵبژاردنیان دەكرد لە پارێزگاكاندا، هەموو لق و ناوچە و ڕێكخراو و بنكه‌كەكان، ئەوپەڕی چالاكییان نواند بۆ سەرخستنی لیستی پارتیمان. كار و خەباتی هەموويان و ئەرككێشانی هەموو دەنگدەرانی پارتی، جێگەی ئەوپەڕی ڕێز و پێزانینه. لە هەمان كاتدا ڕۆڵی ڕاگەیاندنی پارتیمان و چالاكيی گەنجانی پارتی لە هەموو بوارەكان و شێوازەكانی تازەی كاركردن لەپێناو سەرخستنی لیستی پارتیدا، بەرز دەنرخێنین. هەموو كاندیدەكانی لیستی 184ی پارتی و كاركردن و هەوڵ و ماندووبوونيان، جێگەی ڕێزی بەردەوامى سەركردایەتيی پارتین.
سوپاسى ته‌واوى خه‌ڵكى كوردستان ده‌كه‌م كه به‌شدارييه‌كى گه‌وره‌يان له‌سه‌ر ئاستى عێراق تۆمار كرد و مافى ديموكراسيانه‌ى خۆيان به‌كار هێنا، هه‌روه‌ها سوپاسى هه‌موو داموده‌زگا حكوومييه په‌يوه‌نداره‌‌كانى هه‌رێمى كوردستان، به‌تايبه‌تى ده‌زگا ئه‌منييه‌كان ده‌كه‌م كه له به‌ڕێوه‌چوونى ئارام و سه‌ركه‌وتووانه‌ى پرۆسه‌ى هه‌ڵبژاردندا، ڕۆڵێكى گه‌وره‌يان گێڕا.
لەو باوەڕەداین كە هەموو بەرپرس و ئۆرگانەكان و ئەندامانی پارتی لە هەڵبژاردنی داهاتوودا بە هێزوەرگرتن لەو سەركەوتنە تازەیە، كارێكی زۆرتر دەكەن بۆ سەركەوتنی گەورەتری پارتی. خەباتی پارتی و درێژەپێدانی ڕێبازی بارزانيی نەمر و پابەندبوونی بەردەوامی بە ئامانجە پیرۆزەكانی گەلی كوردستانه‌وه، هەمیشە وزەیەكی نوێی خەباتكردن دەداتە ئەندامان و جەماوەری پارتی.
نوێنەرە سەركەوتووەكانی پارتی وەك هەمیشە پابەند دەبن بە خەونەكانی شەهیدان و ئامانجەكانمان و بەرگریكاری دڵسۆز دەبن لە بەرژەوەندییەكانی هەموو گەلی كوردستان و بەرگری لە مافەكانی هەموو خەڵكی عێراق دەكەن لە پەرلەمانی عێراقدا.
كوردستانیانی خۆشەویست،
هەرێمی كوردستان لەسەر ئاستی میللی، دوای بەخشینی شەهیدێكی زۆر و كارەساتی زۆری شەڕ و دوای ماوەیەكی كەم لە شكستپێهێنان و هەڵوەشاندنەوەی هەوڵ و هێرشەكانی نەهێشتنی قەوارەی سیاسی و ئیداريی هەرێمی كوردستان، توانی بە ئارامییەكی زۆره‌وه، سەركەوتووانە پرۆسەی گەورەی هەڵبژاردنی ئەنجومەنی نوێنەرانی عێراق ئەنجام بدات، ئەوەش نیشانەی هۆشیاری و بەرزيی هەستی نیشتمانيی خەڵكی كوردستانە.
ئێمە لە ڕوانگەی بەرژەوەنديی گەلی كوردستانەوە، داوا لە هەموو لایەنەكان دەكەین هەموو ناكۆكییە ناوخۆییەكان وەلاوە بنێن و لەپێناو دابینكردنی بەرژەوەندی و مافە دەستوورییەكانی گەلی كوردستان، ئامادە بن بۆ دانیشتن و گفتوگۆ بەمەبەستی دانانی كارنامەیەكی هاوبەش لەپێناو بەشدارییەكی بەهێزی كوردستان لە حكوومەتی داهاتووی عێراقدا. پارتی بۆ ئەم مەبەستە لە ئێستاوە ئامادەیە بۆ هەموو گفتوگۆ و كارێكی هاوبەش.
گەلی خۆشەویستی عێراق،
پیرۆزبایيی بەڕێوەچوونی پرۆسەی هەڵبژاردنی ئەنجومەنی نوێنەرانی عێراقتان لێدەكەم، هیوادارین ئەنجامەكانی ئەو هەڵبژاردنە ببنە مایەی دروستبوونی پەرلەمان و حكوومەتێكی تازەی ئەوتۆ لە عێراقدا كە دەستوور جێبەجێ بكات و خزمەتگوزارییەكان بۆ هاووڵاتیان دابین بكات و هەموو ئەو مافانەی هاووڵاتیانی عێراق كە لە دەستووردا هاتوون، دابین بكات. ئومێدەوارین ئەو هەڵبژاردنە ببێتەوە سەرەتایەك بۆ دروستكردنەوەیەكی نیشتمانیانەی هەموو دەزگا دەوڵەتی و حكوومییەكانی عێراق كە ڕەنگدانەوەی هەموو پێكهاتەكانی عێراق بن.
ئێمە ئامادەین بۆ گفتوگۆكردنێكی بنیاتنەرانە لەسەر بنچینەی دەستوور بۆ دروستكردنی حكوومەتێكی هاوبەش كە تەوافوق و شه‌راكه‌ت و پاراستنی بەرژەوەنديی هەموو پێكهاتەكانی عێراق بكاتە بنچینەی بەڕێوەبردنی دەسەڵات و كاروباری عێراق، بەو شێوەیەش دەتوانین هەموو كێشەكانی نێوان حكوومەتی هەرێمی كوردستان و حكوومەتی فیدرالیی عێراق چارەسەر بكەین.
نێچیرڤان بارزانی
جێگری سەرۆكی پارتی دیموكراتی كوردستان
19/5/2018
