نوچەنێت: تایبەت
گوتەبێژەی وەزارەتی ئەو قاف و کاروباری ئایینی حکومەتی هەرێم رایدەگەیەنێت، لە ماوەی دەستپێکردنی بانگەشەی هەڵبژادندا، هیچ سکاڵایەک تۆمار نەکراوە بەوەی پێشێلکاری هەبێت یان مزگەوت و شوێنە ئایینییەکان بەکار هێنرابێت بۆ بانگەشەی هەڵبژاردن.
بڕیارە رۆژی ٥-١٢-٢٠١٨، هەڵبژاردنی ئەنجومەنی نوێنەرانی عێراق لەسەرجەم پارێزگاکانی عێراق بەڕێوەبچێت، تادێ لە هەڵبژاردن نزیکدەبینەوە و بانگەشەی لایەنەکان رۆژ بە ڕۆژ گەرمتر دەبێت، پێشتر وەزارەتی ئەو قاف و کاروباری ئایینی حکومەتی هەرێمی کوردستان، هۆشداری دابوو لەوەی هەر کەس و لایەنێک مزگەوت و شوێنە ئاینیییەکان بەکاربهێنێت بۆ بانگەشەی هەڵبژاردن، لەکۆمسیۆن سکاڵای لەدژ تۆمار دەکەن و رووبەڕووی یاسای دەکەنەوە.
لە لێداونێکی تایبەت بە نوچەنێت، نەبەز ئیسماعیل، گوتەبیژەی وەزارەتی ئەو قاف و کاروباری ئایینی حکومەتی هەرێمی کوردستان، لەبارەی بانگەشەی لایەنەکان رایگەیاند “دوای ئەوەی بانگەشەی هەڵبژاردن دەستیپێکرد، ئێمە لە راگەیەندراوێکدا داوامان لە سەرجەم مامۆستایانی ئایینی کرد، کە خۆیان بەدووربگرن لەبەکارهێنانی مزگەوتەکان و شوێنە ئایینییەکان بۆ بانگەشی حیزبی و هەڵبژاردن، خۆشبەختانە تائێستا مامۆستایانی ئایینی پابەندن بە ڕاگەیەندراوەکەوە، هیوادارین ئەوە بەدەوامبێت تاکو بانگەشە تەواو دەبێت”.
گوتەبێژەکەی وەزارەتی ئەو قاف ئاماژە بەوە دەکات، لەو ماوەیەدا هیچ سکاڵایەک تۆمار نەکراوە و ئاگادار نەکراوینەتەوە بەوەی، کە پێشێلکاری هەبێت یان مزگەوتێک یاخود شوێنێکی ئاینی ئیستخلال کرابێت بۆ حیزبێکی دیاری کراوە، هەموو کارەکان بەپێی رێنماییەکانی وەزارەت دەڕوات بەڕێوە.
