نوچەنێت-ئیرنا
ئانجێلا مێرکل، راوێژکاری ئەڵمانیا وێڕای جەخت کردنەوەی لە سەر رێککەوتنی ئەتۆمی، دەڵێت، ئەم رێککەوتنە نابێ هەڵبوەشێتەوە، بەڵام دەبێ ئێران راکێشی سەر مێزی دانوستان بکرێت و بەرنامەی موشەکی و سیاسەتی دەستوەردانی لە کاروباری وڵاتانی ناوچەکە، باس و گفتوگۆی لە سەر بکرێت.
مێرکل دەشڵێت، بەرنامەی موشەکی ئێران و ئامادەبوونی سیاسی ئەم وڵاتە لە سوریا، پێویستە دانوستانی لە سەر بکرێت و ئەمە هەڵوێستی گشتی یەکێتی ئەوروپایە.
لە بارەی بانگەشەکانی سەرۆکوەزیرانی ئیسرائیل لە بارەی بەرنامەی ئەتۆمی ئێران، مێرکل رایگەیاند، پێویستە بنیامین نەتەنیاهۆ، بەڵگە و ئەرگیۆمێنی خۆی رادەستی ئاژانسی نێودەوڵەتی وزەی ئەتۆمی بکات. چونکە ئەم دامەزراوە بەرپرسیارە لە پشکنین و بەدواداچوون بۆ کاروباری ئەتۆمی وڵاتان.
هایکۆ ماس، وەزیری دەرەوەی ئەڵمانیا پێشتر هەڵوێستی وڵاتەکەی لە بارەی بانگەشەکانی نەتەنیاهۆ خستۆتە روو- و رایگەیاندووە، دەبێ ئاژانسی نێودەوڵەتی وزەی ئەتۆم، بەدواداچوون بۆ ئەو بەڵگانە بکات.
پێشتریش سەرۆکی لیژنەی پەیوەندییەکانی دەرەوەی پەرلەمانی ئەڵمانیا و سەرۆکی کۆنفڕانسی ئاسایشی میونشن، جەختیان لە سەر بەردەوامبوونی رێککەوتنی ئەتۆمی کردۆتەوە.
