نوچەنێت
ئەمڕۆ سەرۆکوەزیرانی هەرێمی کوردستان لەگەڵ باڵیۆزی به‌لجیكا له عێراق و ئوردن کۆبووە و باسیان له پرۆسه‌ی سیاسیی عێراق، گفتوگۆكانی نێوان هه‌ولێر ـ به‌غدا بۆ چاره‌سه‌ركردنی كێشه‌كان و هه‌ڵبژاردنه‌كانی داهاتووی عێراق و هه‌رێمی كوردستان و قۆناخی دوای داعش كرد.
بەگوێرەی هەواڵێکی ماڵپەڕی حکومەتی هەرێمی کوردستان، رۆژی چوارشه‌ممه ١١-٤-٢٠١٨، نێچیرڤان بارزانی، سه‌رۆكوه‌زیرانی هه‌رێمی كوردستان، پێشوازی له هندریك ڤان دی فیڵدی، باڵیۆزی به‌لجیكا له عێراق و ئوردن و شاندێكی یاوه‌ری كرد.
بەپێی هەواڵەکە لە کۆبوونەوەکەدا، باڵیۆزی به‌لجیكا به‌ناوی خۆی و حكومه‌تی وڵاته‌كه‌یه‌وه پرسه و سه‌ره‌خۆشی پێشكه‌ش به سه‌رۆكوه‌زیرانی هه‌رێمی كوردستان كرد بۆ كۆچی دوایی دلۆڤان بارزانی، دواتر باس له پرۆسه‌ی سیاسیی عێراق و گفتوگۆكانی هه‌ولێر ـ به‌غدا بۆ چاره‌سه‌ركردنی كێشه‌كان و هه‌ڵبژاردنه‌كانی داهاتووی عێراق و هه‌رێمی كوردستان و قۆناخی دوای داعش، كرا.
لە بەرامبەردا، نێچیرڤان بارزانی، سەرۆکوەزیرانی هەرێمی کوردستان، سوپاسی ئه‌و سه‌ردانه و پێشكه‌شكردنی سه‌ره‌خۆشی له شاندی میوان كرد، پوخته‌یه‌كیشی ده‌رباره‌ی هه‌ڵوێستی هه‌رێمی كوردستان له‌سه‌ر پرۆسه‌ی سیاسی و هه‌ڵبژاردنه‌كانی داهاتووی عێراق، قۆناخی دوای داعش، پرسی ئاواره و په‌نابه‌ران، چۆنییه‌تیی مامه‌ڵه‌كردن له‌گه‌ڵ قۆناخی ئێستا پێشكه‌ش كرد.
له به‌شێكی دیكه‌ی قسه‌كاندیدا وەک لە هەواڵەکەدا هاتووە، هه‌وڵه چاكسازییه‌كانی حكومه‌تی هه‌رێمی كوردستان و به‌ره‌وپێشچوونی دیالۆگی له‌گه‌ڵ به‌غدا بۆ شاندی میوان خسته‌ڕوو.
تاوتوێكردنی چه‌ند بابه‌تێكی په‌یوه‌ست به دۆخی ناوچه‌كه‌وه، لایه‌نێكی دیكه‌ی دیداره‌كه بوو.
