نوچەنێت
لە شاری سلێمانی، بۆ وەرگرتنەوەی مافەکانیان، خاوەن پشکەکانی چاڤی لاند خۆپیشاندانێکیان ساز کرد و رایانگەیاند، کە ٧٠ سکاڵا لەسەر خاوەنی کۆمپانیای نالیا تۆمار دەکەن.
دانا محەمەد، پارێزەری خۆبەخشی خاوەن پشکەکان، لە پرێس کۆنفرانسێکدا لەناو خۆپیشاندەران، رایگەیاند “شاسوار عەبدولواحید، خاوەنی کۆمپانیای نالیا، بە قودرەتی قادر و بەبێ کڕینی هیچ پشکێک، بووەتە خاوەنی٨٠%ی پشکەکانی چاڤی لاند”.
دانا محەمەد، کە خۆیشی خاوەنی پشکە لە پرۆژەکەدا دەڵێت، شاسوار لەرێگەی کەناڵەکانییەوە هەڕەشەی لێ دەکات، مەترسی لەسەر ژیانی ئەو پارێزەرە دروست کردووە و داوای لێ دەکات واز لە بەرگریکردن لە خاوەن پشکەکان بهێنێت.
ئەو پارێزەرە گوتیشی “خۆپیشاندەران، کە رۆژی سێشەممە ١٠-٤-٢٠١٨، خۆپیشاندانەکەیان ساز کرد، لە پۆلیسی سەرای شاری سلێمانی ٧٠ سکاڵای یاسایی لە دژی شاسوار عەبدولواحید، تۆمار دەکەن”.
دانا محەمەد ئاماژەی بەوەدا، کە خاوەنی کۆمپانیای نالیا بۆ فێڵکردن لە خاوەن پشکەکان و خۆدزینەوە لە پێدانی مافەکانیان، باسی ئەوە دەکات، هەموو پشکەکانی خۆی فرۆشتووەتە کۆمانیای سەما لوئلوئە، بەڵام ”ئەو کۆمپانیایە وەهمییە و هیچ بنکە و شوێنێکی نییە“.
