نوچەنێت:تایبەت
ئەندام پەرلەمانێکی پارتی لەپەرلەمانی عێراق رایدەگەیەنێت، پەرلەمانی عێراق بێ ئەوەی هیچ دەستکارییەکی یاسای بودجەی ٢٠١٨ی عێراقی بکات. رەوانەی سەرۆکایەتی کۆماری کردەوە.
لە دوای پەسەندکردنی پڕۆژەیاسای بودجەی ٢٠١٨ بەزۆرینە و بەبێ کورد، پەرلەمانی عێراق یاساکەی رەوانەی سەرۆکایەتی کۆمارکرد. لە ناوەڕاستی مانگی ٣ دا، فوئاد مەعسوم، سەرۆککۆماری عێراق پەسەندکردنی یاسای بودجەی رەتکردەوە و رەوانەی پەرلەمانی کردەوە، بۆ ئەوەی گۆڕانکاری لەو ماددانە بکرێ کەبەگوتەی سەرۆکایەتی کۆمار “نادەستورین” و ژمارەیان دەگاتە ٣١ ماددە و بڕگە.
لەسەر بنەمای فرۆشتنی یەك بەرمیل نەوت بە ٤٦ دۆلار، یاسای بودجەی ساڵی ٢٠١٨ عێراق بە ٩١ ترلیۆن و٦٤٣ ملیار و٦٦٧ ملیۆن و ٢٣٦ هەزار دینار، خەمڵێنراوە.
ئەمە لەکاتێکدایە، کە لەیاساكەدا داواكارییەکانی كورد كە جێگیركردنی پشكی ١٧%ی بودجە بوو، جێگیرنەكراو بۆ ١٢،٧% كەمكراوەتەوە، ئەوەش مەرجداركراوە بە هەناردەكردنی ٢٥٠ هەزار بەرمیل نەوتی هەرێمی كوردستان، لە رێگەی بەغداوە.
لە لێدوانێکی تایبەت بەنوچەنێت، نەجیبە نەجیب ئەندامی فراکسیۆنی پارتی لە پەرلەمانی عێراق، رایگەیاند”لە دانیشتنی ئەمڕۆ سێشەممە ٢٧-٣-٢٠١٨پەرلەمانی عێراق، بەبێ دەستکاریکردن و وەک خۆی رەوانەی سەرۆکایەتی کۆمار کرایەوە، هۆکاری گەڕانەوەکەشی تەنها سیاسییە”.
نەجیبە نەجیب ئاماژەی بەوەشکرد، کە سەرۆک کۆماری عێراق دەسەڵاتی ئەوەی نییە دەستکاری پڕۆژە یاسای بودجە بکات، هۆکارەکەشی بەسیاسی دەزانێت و دەڵێت”ئەگەر سەرۆککۆمار شیعە یان سوننە بوایە بەشێوەیەکی دیکە دەبوو، کە رەنگە ئەودەسەڵاتەی هەبوایە دەستکاری یاسای بودجە بکات، بەڵام لەبەر ئەوەی سەرۆککۆمار کوردە، ناتوانێت دەستکاری بکات”.
