نوچەنێت
بۆ یادی ڕاپەڕین و ڕزگارکردنی هەولێر، ماراسۆنێک بەڕێوە دەچێت.
سبەی یەکشەممە ١١-٣-٢٠١٨، لە یادی راپەڕین و ڕزگارکردنی شاری ھەولێر ماراسۆنی (ئاشتی کوردستان) بە دروشمی (بەرەو ئاشتی) بەڕێوەدەچێت.
ئەم ماراسۆنە بە سەربەرشتی، ھەردوو ڕێکخراوی ماراسۆنی ئاشتی کوردستان، ئیبن مستەوفی و تیپی ھونەری کانی بۆت، بە سپۆنسەری تیشک نێت، کۆڕەک تیلیکۆم، پەیمانگەکانی نۆبل، کوردستان، ستادیۆم و ھانزۆ گروپ بەڕێوە دەچێت.
کارۆخ ساڵح، ئەندامی دەستەی باڵای ماراسۆنەکە دەڵێت، سبەی یەکشەممە ١١-٣-٢٠١٨، بۆ یەکەمجار ماراسۆنی ئاشتی نێودەوڵەتیی کوردستان ئەنجام دەدەین. لەم ماراسۆنەدا، ھەموو چین و توێژەکانی کۆمەڵگە، بە ھەردوو ڕەگەز، ھەروەھا نوێنەری نێردە دیپلۆماسییەکان و ڕێکخراوە نێودەوڵەتییەکان، بۆ گەیاندنی پەیامی ئاشتی و برایەتی بەشداری دەکەن.
ئەم ماراسۆنە بەگوێرەی ستانداردی جیھانییە، چونکە نیو ماراسۆنی 21 کم لەخۆ دەگرێت و بۆ گەیاندنی پەیامی ئاشتی گەلی کوردستان بە ھەموو جیھان، ھاوڵاتییان و ھەوادارانی وەرزش و ئاشتی، دەتوانن لە ڕێگەی بەشداریکردن لە یەکێک لەم ڕاکردنانەدا پەیامی خۆیان بگەیەنن.
