نوچەنێت
پەلامارەكەی توركیا بۆ سەر عەفرین لە رۆژئاوای كوردستان ١٧ رۆژی تێپەڕاند. بەهۆی ئەو هێرشانەوە ژمارەیەكی زۆر هاوڵاتی مەدەنی بوونەتە قوربانی و هێزەكانی سوریای دیموكرات (هەسەدە)ش هۆشداری دەدات، كە توركیا و هێزە لایەنگرەكانی، چەكی قەدەغەكراویان بەكارهێناوە.
رێكخراوی مانگی سوری كورد (هەیڤا سۆرا كوردی) لە راپۆرتێكدا، كە رۆژی دووی شوبات بڵاوی كردەوە، نیگەرانییەكانی هەسەدە سەبارەت بە چەكە قەدەغەكراوەكان پشتڕاست دەكاتەوە و لە راپۆرتێكی خۆیاندا ئاماژە بۆ بەكارهێنانی چەكی كیمیایی لەلایەن سوپای توركیا دەكەن.
بەپێی راپۆرتێكی رۆژی هەینی رابردووی هەیڤا سۆر، پێنج كادیری ئاسایشی عەفرین هێنراونەتە بنكەی هێوركردنەوەی دڵەڕاوكێی رێكخراوەكە و حاڵەتی دڵتێكەڵهاتن، رشانەوە، قورسیی هەناسە و نیمچە بێهۆشییان هەبووە. لە راپۆرتەكەدا تەنیا ناوی چوار كەسیان هاتووە كە بریتین لە عەبدوللەتیف ئیبراهیم (تەمەن 32 ساڵ)، ئەحمەد حوسنی عەبدۆ (تەمەن 37 ساڵ)، مەلاز ئالافۆ ( 22 ساڵ) مامۆ جەمۆ ( 30 ساڵ).
راپۆرتەكەی هەیڤا سۆر ئاماژە بۆ ئەوە دەكات كە تیمەكەیان راهێنانی چەكە كیمیاییەكانی پێكراوە و جەخت لەوە دەكەنەوە كە هەرچەند تاوەكو ئێستا رەوشی پێنج كادیرەكە بە وردی شینەكراوەتەوە، بەڵام بەو پێیەی توركیا هێزە كوردییەكانی سووریا بە باڵی پەكەكە دەزانێت و پێشتریش چەكی كیمیایی لەدژی پەكەكە بەكارهێناوە، بۆیە حاڵەتی پێنج كادیرەكە گومانی ئەوەی دروستكردووە كە هێزەكانی لایەنگری توركیا چەكی قەدەغەكراویان بەكارهێنابێت. پێنج ئاسایشەكە لە ئەشكەوتێكدا خۆیان حەشار دابوو كاتێك هاوەنێك بەر دەریچەی ئەشكەوتەكە كەوتبوو.
