نوچەنێت
کۆنسوڵخانەی کۆماری ئیسلامی ئێران لە هەولێر رایدەگەیەنێت، سەرۆکوەزیرانی هەرێمی کوردستان سەردانی تاران دەکات و هاوکات سەردانەکە بە ئەرێنی ناودەبات.
کۆنسوڵخانەی کۆماری ئیسلامی ئێران رایگەیاند “نێچیرڤان بارزانی، سەرۆکی حکومەتی هەرێمی کوردستان، لە درێژەی هەوڵە دیپلۆماسییەکانی و گفتوگۆ لەگەڵ وڵاتانی دیکە بەمەبەستی گفتوگۆ لەبارەی پرسە سیاسی، ئابووری، ئەمنی و کەلتوورییەکان، سەردانی تاران دەکات و لە رۆژی ٢١-١-٢٠١٨، لەگەڵ بەرپرسانی ئێران کۆدەبێتەوە”.
بەپێی راگەیاندنی کۆنسوڵخانەی کۆماری ئیسلامی ئێران لە هەولێر، لەو سەردانەدا قوباد تاڵەبانی، جێگری سەرۆکی حکومەت و شاندێکی حکومی یاوەری سەرۆکوەزیران دەکەن.
کۆنسوڵخانەی کۆماری ئیسلامی ئێران، سەردانی سەرۆکوەزیرانی کوردستان بۆ ئەو وڵاتە بە گرنگ ناودەبات و دەڵێت “سەفەری ئەو شاندە، کە یەکەمین سەردانە لەدوای گشتپرسی و دژایەتی حکومەت و دادگای فیدراڵی عێراق بۆ گشتپرسییەکە، بە ئەرێنی دادەنرێت”.
