‌ دوو مەرزی دیكەی هەرێمی كوردستان بە نێودەوڵەتی دەكرێن

نوچەنێت
وا بڕیارە مانگی داهاتوو، وەفدێكی دەروازە سنورییەكانی عیراق سەردانی هەرێمی كوردستان بكەن، بە مەبەستی بەنێودەوڵەتیكردنی مەرزەكانی كێلێ و سەیرانبەن.

ڕۆژی پینج شه‌مه‌ ١٨-١-٢٠١٨، ئەمین بەكر پەرلەمانتاری فراكسیۆنی گۆڕان لە پەرلەمانی عیراق، لە پەڕەی خۆی لە تۆڕی كۆمەڵایەتی فەیسبوك رایگەیاندووە، سەرەتای مانگی داهاتوو وەفدێكی دەروازە سنوریەكانی عیراق، بۆ بە نێودەوڵەتیكردنی مەرزی كێلێ و سەیرانبەن، سەردانی هەرێمی كوردستان دەكات.

ئەمین بەكر ئاماژەی بەوەكردووە، دوای بەدواداچونیان بۆ مەرزەكانی كێلێ و سەیرانبەن و بینینی سەرۆكی لیژنەی باڵای وەزاری دەروازە سنورییەكان، گوڕهان موفتی لە ئەنجومەنی وەزیرانی عێراق، پێی راگەیاندووە كە رەزامەندی لەسەر پێكهێنانی لیژنەیەك دراوە بەسەرۆكایەتی جێگری سەرۆكی دەروازە سنوریەكان و سەرەتای مانگی داهاتوو لیژنەكە سەردانی هەرێم، دەكات.

پەرلەمانتارەكەی گۆڕان هەروەها نوسیویەتی “پێشتر ناوبراو ئاگاداری كردبومەوە، كە هەموو ڕێكارەكان تەواو بووە و تەنها وەڵامی وەزارەتی دەرەوە ماوە، ئەوە بوو ئەوكات پەیوەندیم كرد بەبەرپرسانی وەزارەتی دەرەوە و وەڵامی نووسراوی لیژنەكەیان دایەوە. بەم شێوەیەش لیژنەكە خۆی ئامادە دەكات لەمانگی ئایندەدا سەردانی ئەو دوو مەرزە بكات و، دەست بكرێت بەكردنەوەی فەرمی ئەو دوو مەرزە”