كۆمپانیایەكی فەرەنسی پشكی 35%ی دوو كێڵگەی هەرێم دەكڕێت
نوچەنێت . نالیا
دوای ئیكسۆن موبیل و شیڤرۆن كۆمپانیای تۆتاڵی فەرەنسیش دێتە هەرێمی كوردستان و بەشێك لە پشكەكانی كۆمپانیای ماراسۆن دەكڕێت.
كۆمپانیای ماراسۆن كە بارەگاكەی لە شاری هیۆستنە لە ولایەتە یەگكرتوەكانی ئەمریكا رایگەیاند كە مافەكانی گەڕان و پشكنینی بەدوای نەوت لەدوو ناوچەی هەرێمی كوردستاندا بە كۆمپانیای نەوتی تۆتاڵی فەرەنسی فرۆشتوە.
كۆمپانیای ماراسۆن ئاشكرای كردوە، بە گوێرەی رێكەوتنەكە 35% پشكەكانی لە هەردوو ناوچەی حەریر و سەفین بە كۆمپانیای تۆتاڵ فرۆشتوەو لەهەمانكاتدا پشكەكانی لە دوو ناوچەی دیكە كە دەكەونە باكوری رۆژهەڵاتی هەولێرەوە بۆ 45% كەمكردوەتەوە.
كۆمپانیای ماراسۆن وردەكاری كرێبەستەكەو بەهاكەی بڵاونەكردۆتەوە.
ئەم گرێبەستەی نێوان كۆمپانیای تۆتال و ماراسۆن لە كوردستان لە كاتێكدایە كە پەیوەندییەكانی نێوان بەغدا و هەولێر لەو پەڕی كرژی و ئاڵۆزییدایەو حكومەتی عێراق ئەو گرێبەستانەی كۆمپانیاكانی نەوت لە كوردستان ئەنجامی دەدەن بە نایاسایی وەسف دەكات، لە ئێستاشدا لیژنەیەك لە ئەنجومەنی وەزیرانی عێراق پێكهێنراوە بۆ بەدواداچونی دۆسێی بەرهەمهێنان و فرۆشتنی نەوت لە كوردستان، بەڵام بەوتەی وەزیری بازرگانی عێراق كە ئەندامە لە لیژنەكە تائێستا لیژنەكەیان دووجار كۆبونەوەیان كردوە بەڵام نوێنەرانی هەرێمی كوردستان بەشدارایان تێدا نەكردوە.
