نوچەنێت:تایبەت
قائیمقامی دەربەندیخان رایدەگەیەنێت، بڕی ئەو پارەی کەحکومەتی ھەرێم تەرخانیکردبوو بۆ قەزا کە، گەیشتووەتە خەزێنەی سلێمانی و بەڕێوبەرایەتی کارەبای دەربەندیخان, سولفەی یەکەمی ئەو پارەیەی وەرگرتووە.
لە لێدوانێکی تایبەت بەنوچەنێت، ناسیح مەلاحەسەن قائیمقامی قەزای دەربەندیخان ر ایگەیاند”حکومەتی ھەرێم بڕی دوو ملیار دیناری تەرخانکردووە، بۆچاککردنەوەی بەنداوی دەربەندیخان و چاککردنەوەی تۆری ئاوی خواردنەوە و کارەبای قەزای دەربەندیخان، کە بەهۆی بومەلەرزەکەوە زیانیان پێگەیشتبوو، هەروەها بڕی ١٠٠ملیۆن دیناریش وەکو پێشینە، تەرخانکراوە بۆ ئەو ئیشە بچوک و بەپلانەی کە لەبەردەستدایە”.
هەروەها ئاماژە بەوەدەکات، کە ئێستا لەقۆناغی پارەوەرگرتندان و دەرخستەکان تەواو بووە. بڕی ئەوپارەی کە حکومەتی هەرێم تەرخانیکردبوو بۆ قەزاکە، گەیشتووەتە خەزێنەی سلێمانی.
هاوکات دەڵێت”دوێنێ بەڕێوەبەرایەتی کارەبای دەربەندیخان، سولفەی یەکەمی ئەو پارەیەی وەرگرتووە و بەرێوەبەرایەتی ئاوی دەربەندیخانیش، لە رۆژانی داهاتوو، دوای تەواوکردنی رێکارە یاسایییەکان دەتوانێت وەریبگرێت”.
لەبارەی کەرتی پەروەردەوەشەوە قائیمقامی دەربەندیخان دەڵێت”بڕی ١٦٠ملیۆن دیناری تەرخانکرابوو، بەڵام بەشێکی بۆ دەربەندیخانە، بەشەکەی تری بۆ شارەزورو هەڵەبجەیە”.
