نوچەنێت: تایبەت
ئەمڕۆ چوارشەممە ١٣-١٢-٢٠١٧، شاندێکی ئەنجومەنی وەزیرانی دەچێتە پەرلەمان و لەگەڵ سەرۆکایەتی پەرلەمان کۆببێتەوە. ئەندامێکی فراکسیۆنی یەكگرتووی ئیسلامی دەڵێت “وەکو فراکسیۆنی یەکگرتووی ئیسلامی پڕۆژەیەکی چاکسازییمان ئامادەکردووە و ناوەڕۆکی پڕۆژەکە رادەگەیەنین”.
لە لێدوانێکی تایبەت بە نوچەنێت، بەهزاد دەروێش ئەندامی فراکسیۆنی یەکگرتووی ئیسلامی، لە پەرلەمانی کوردستان رایگەیاند “بڕیارە ئەمڕۆ چوارشەممە شاندێکی ئەنجومەنی وەزیرانی هەرێمی کوردستان، بچێتە پەرلەمان و لەگەڵ دەستەی سەرۆکایەتی پەرلەمان کۆببێتەوە، بە مەبەستی گفتوگۆکردن لە سەرخەرجی و داهات بۆ شەش مانگی داهاتوو”.
هەروەها بەهزاد دەروێش دەڵێت “شاندەکەی حکومەت پێکدێت، لە سەرۆکی ئەنجومەنی وەزیران و جێگرەکەی، هەروەها وەزیری سامانە سرووشتییەکان، وەزیری دارایی بەوەکالەت و وەزیری پلاندانان”.
ئەو پەرلەمانتارە راشیگەیاند “جیا لەو کۆبوونەوەیە، وەکو فراکسیۆنی یەکگرتووی ئیسلامی پڕۆژەیەکی چاکسازی سیاسی و ئابووریمان ئامادەکردووە و بەنیازین ئەمڕۆ لە كۆنگرهیهكی رۆژنامەوانیدا ناوەڕۆکی پڕۆژەکەمان له پهرلهمان رابگەیەنین، کە ٩ تەوەر لەخۆدەگرێت”.
