نوچەنێت
لە کۆنگرەیەکی رۆژنامەوانی نێوانی سەرۆکی فەرەنسا وسەرۆکی حکومەتی هەرێمی کوردستان ماکرۆن رایگەیاند، هیوا و متمانەی تەواومان بە گەنجە سەرکردەکانی کورد نێچیرڤان بارزانی و قوباد تاڵەبانی هەیە. نێچیرڤان بارزانی دەڵێت “پابەندبوونی خۆمان بۆ عێراقێک راگەیاند، کە دەستوور تێیدا سەروەر و چەسپاوە”.
ئێمانوێل ماكرۆن، سەرۆکی فەرەنسا لە کۆشکی ئێلیزێ پێشوازی لە شاندێکی باڵای هەرێمی کوردستان بەسەرۆکایەتی نێچیرڤان بارزانی کرد و کۆبوونەوە، لەدوای کۆبوونەوەکەش کۆنگرەیەکی رۆژنامەوانییان سازکرد.
لە کۆنگرەکەدا ماكرۆن رایگەیاند “دۆستایەتی کورد و گەلی فەرەنسا مێژووییەکی دوورودرێژی هەیە و لەگەڵ گەلی کورد خەباتی هاوبەشمان لەدژی تیرۆر هەیە”.
هەروەها رایگەیاند: “پشتیوانی مافەکانی گەلی کورد دەکەین لە چوارچێوەی عێراقدا و کوردستانێكی یەکدەنگ دەبێتە هۆی سەقامگیری لە ناوچەکە”. پشتیوانیشی بۆ عێراقێکی یەکگرتوو و بەهێز دەربڕی.
سەرۆکی فەرەنسا گوتیشی: “لە کۆبوونەوەکەدا ئەنجامی دەرهاوێشتەکانی دوای گشتپرسییەکەی هەرێمی کوردستانمان تاوتوێکرد و وەکو حکومەتێكی شەرعیش پێشوازیمان لە حکومەتی هەرێمی کوردستان کرد”.
ماکرۆن باسی کەرکوک و حەشدی شەعبیشی کرد و گوتی: “دەبێت ماددەی 140 لە ناوچە جێناکۆکەکان جێبەجێ بکرێت، دەبێت هیچ میلیشیایەکیش لە عێراق نەمێنێت، بە حەشدی شەعبیشەوە”.
هاوکات نێچیرڤان بارزانی رایگەیاند “پابەندبوونی خۆمان بۆ عێراقێک راگەیاند کە دەستوور تێیدا سەروەر و چەسپاوە”.
سوپاسی رۆڵی سەرۆکی فەرەنساشی کرد بۆ هەموو ئەو پەیوەندییە مێژووییانەی لەگەڵ کورد و عێراق هەیبووە و، هەروەها بۆ دۆزینەوەی چارەسەرێک بۆ کێشەکانی نێوان هەولێر و بەغدا.
بارزانی گوتیشی: “لە سێ بۆ چوار خاڵدا بۆچوونی خۆمان بە سەرۆککۆماری فەرەنسا گەیاند، ئێمە ئامادەین لەچوارچێوەی دەستووری عێراقدا گفتوگۆ بکەین، ئەوەشمان بە سەرۆکی فەرەنسا گەیاندووە”.
