نوچەنێت
گوتەبێژی ئەنجومەنی ناوەندی یەكێتی رایدەگەیەنێت، پێشنیارێك لە ئارادایە بۆئەوەی لە كۆنگرەی داهاتوی حزبەكەیدا، پۆستی سكرتێری گشتی یەكێتی نەمێنێت، وەك رێگە چارەیەك بۆ كۆتاییهێنان بە- بەشێك لە ململانێ و ناكۆكییە ناوخۆییەكان.
لەتیف نێروەیی، گوتەبێژی ئەنجومەنی ناوەندی یەكێتی نیشتمانی کوردستان بەرادیۆی نەوای راگەیاندووە”بەپێی پەیڕەوی ناوخۆ، پێویستە رەشنوسی پەیڕەوی ناوخۆ لەلایەن ئەنجومەنی ناوەندییەوە ئامادەبكرێت، تا لەكۆنگرەدا پەسەند بكرێت و بەر لە سێ ساڵ ئەو رەشنوسەیان ئامادەكردوە”.
هەروەها دەڵێت”دوای قۆناغی كۆچی دوایی جەلال تاڵەبانی، سكرتێری گشتی حزبەكەیان گۆڕانكاری لەو رەشنوسەدا دەكەن و پێشنیارێك لە ئارادایە، بۆئەوەی پۆستی سكرتێری گشتی یەكێتی، نەمێنێت و زۆرینەی رەهای ئەندامانی ئەنجومەنی ناوەندیشی لەگەڵدایە”.
ئەندامەکەی ئەنجومەنی ناوەندی یەکێتی، هۆكاری پێشنیارەكەی بۆ ئەوەگەڕاندەوە، بەهۆی ئەوەی سەرچاوەی بەشێك لەناكۆكی و ململانێكانی ناو یەكێتی لەئێستادا بۆ ئەوەیە، هەر كەس چاوی لەوەیە ببێتە سكرتێری گشتی، بە نەمانی ئەو پۆستەش كێشەیەكی گەورە چارەسەر دەبێت.
