نوچەنێت-رووداو
وەزیری دەرەوەی قوبرس رایدەگەیەنێت، دەکرێت حکومەتی وڵاتەکەی بڕێکی زیاتر چەکی سووک و فیشەک بۆ هێزەکانی پێشمەرگە بنێرێت.
لوانیس کاسولیدیس، وەزیری دەرەوەی قوبرس گوتی، ئەو چەکە سووک و فیشەکانەی کە حکومەتی وڵاتەکەی چی دیکە پێویستی پێیان نییە، دەکرێت بیاننێرێت بۆ پێشمەرگە ، تاوەکو لە شەڕی دژی داعش بەکاریانبهێنن.
وەزیری دەرەوەی قوبرس رایگەیاند، تاوەکو ئێستا حکومەتی وڵاتەکەی دوو کاروان چەکی سووکی لە جۆری “زاستاڤا”ی سربی و فیشەک بۆ هێزەکانی پێشمەرگە ناردووە و ئەو چەک و فیشەکانەش لە رێگەیی ئەمریکاوە گەیەندراونەتە شوێنی مەبەست.
کاسولیدیس گوتی، هەر یارمەتیدانێکی دیکەی هێزەکانی پێشمەرگە بە راوێژ لەگەڵ هاوبەشەکانی دەبێت لە هاوپەیمانێتی نێودەوڵەتی دژی داعش و ئاماژەی بەوەشکرد، وڵاتەکەی پاڵپشتی لە یەکپارچەیی خاکی عێراق دەکات.
وەزیری دەرەوەی قوبرس ئاماژە بەوە دەدات، وڵاتەکەی چەکی سووکیشی بۆ هێزە سەربازییەکانی لوبنان و ئوردنیش ناردووە.
