نوچەنێت
فەرماندەی لەشکری تایبەتی گوڵانی پێشمەرگە رایدەگەیەنێت، ئەمڕۆ سێشەممە هێزی پێشمەرگە لە ناوچەی مەحموودیە لە نزیک رەبیعە هێرشێکی حەشدی شەعبی تێکشکاند.
مەنسوور بارزانی، فەرماندەی لەشکری تایبەتی گوڵان، بە “رووداو”ی راگەیاند: کاتژمێر 08:20 خولەکی بەیانی ئەمڕۆ سێشەممە 24-10-2017، هێزێکی حەشدی شەعبی هێرشی کردە سەر سەنگەرەکانی پێشمەرگە لە مەحموودیە.
مەنسوور بارزانی گوتی “هێزەکەی حەشدی شەعبی لە رەبیعەوە بەرەو مەحموودیە دەهات، پێشمەرگە حەشدی ئاگادارکردەوە لە پێشڕەویکردن، بەڵام زیاتر هاتنە پێش و شەڕ روویدا”.
ئەو فەرماندەیە ئاماژەی بەوەدا، کە لە ئەنجامی شەڕەکە دوو هامەر و باجەرێکی حەشدیان تێکشکاندوون، حەشدیش بە فەرمی داوایکردووە شەڕ بووەستێت. هەروەها دڵنیاییشی دا، کە پێشمەرگە سەلامەتن و هیچ زیانێکیان بەرنەکەوتووە.
