نوچەنێت
سەرۆکی فەرەنسا لە رێگەی تەلەفۆنەوە پەیوەندی بە سەرۆکی هەرێمی کوردستانەوە دەکات و نیگەرانی خۆی لە بارودۆخ و گرژییەكانی نێوان هەولێر و بەغدا نیشاندا و رایگەیاند “باشترین رێگە بۆ چارەسەركردنی كێشەكان گفتوگۆ و دانوستاندنە”.
ئێوارەی رۆژی دووشەممە 23-10-2017، ئیمانوێل ماكرۆن، سەرۆكی فەرەنسا لە رێگەی تەلەفۆنەوە پەیوەندی بە مەسعود بارزانی، سەرۆکی هەرێمی کوردستان كرد.
بەپێی راگەیەندراوێکی سەرۆکایەتی هەرێمی کوردستا،ن لەو پەیوەندییە تەلەفۆنییەدا ئیمانوێل ماكرۆن، سەرۆكی فەرەنسا لەبارەی گرژییەکانی هەولێر و بەغدا “نیگەرانیی خۆی لە بارودۆخ و گرژییەكانی نێوان هەولێر و بەغدا نیشاندا و داوای ئەوەی كرد، كە هەردوولا دان بەخۆیاندا بگرن و شەڕ و پێكدادان دروست نەبێت”. جەختیشی لەوە كردەوە “باشترین رێگە بۆ چارەسەر كردنی كێشەكان گفتوگۆ و دانوستاندنە”.
هاوکات مەسعود بارزانی، سەرۆکی هەرێمی کوردستان بارودۆخ و رووداوەكانی ئەو دواییەی نێوان هەرێمی كوردستان و عێراقی بۆ سەرۆكی فەرەنسا شیکردەوە.
سەبارەت بە هەوڵەکانی فەرەنسا بۆ چارەسەکردنی کێشەکانی هەولێر و بەغدا، وەک لە راگەیێندراوەکەدا هاتووە “سەرۆكی فەرەنسا لە هەوڵی خۆی بەردەوام دەبێت بۆ ئەوەی هەردوولا بە گفتوگۆ چارەسەری كێشەكانیان بكەن”.
