نوچەنێت: تایبەت
ئەندام پەرلەمانێکی گۆڕان رایدەگەیەنێت، بزووتنەوەی گۆڕان ئادەکاری تەواویکردووە بەمەبەستی ئەنجامدانی هەڵبژاردنەکان لەکاتی خۆیدا و دەشڵێت “ئەو ئامادەگی و پەرۆشییە بەدیناکەین لەلایەنەکان بۆ ئەنجامدانی هەڵبژاردنەکان لەکاتی خۆیدا”.
تەنیا سێ هەفتە ماوە لەو وادەیەی كۆمیسیۆنی باڵای سەربەخۆی هەڵبژاردن و راپرسی بۆ ئەنجامدانی هەڵبژاردنی پەرلەمان و سەرۆكی هەرێمی كوردستان دیاریی كردووە، بەڵام زۆربەی ئاماژەكان وا نیشاندەدەن، كە هەڵبژاردنەكە لەو كاتەدا ناكرێ و دوادەخرێت.
لە لێدوانێکی تایبەت بە نوچەنێت، ئەیوب عەبدوڵڵا ئیسماعیل، ئەندامی فراکسیۆنی بزووتنەوەی گۆڕان لەپەرلەمانی کوردستان، لەبارەی ئەنجامدانی هەڵبژاردنەکانی پەرلەمان و سەرۆکایەتی هەرێم رایگەیاند: دەزگای هەڵبژاردنەکانی بزووتنەوەی گۆڕان ئامادەکازی تەواویکردووە و لەئێستادا خەریکی ئامادەکردنی لیستی هەڵبژاردنە، هەروەها خۆشی ئامادەکردووە بۆ مەبەستی ئەنجامدانی هەڵبژاردنەکانی پەرلەمانی کوردستان و سەرۆکایەتی هەرێم لەکاتی خۆیدا.
پەرلەمانتارەکەی گۆران سەبارەت بە ئامادەیی لایەنەکانی دیکە بۆ ئەنجامدانی هەڵبژاردنەکان لەکاتی خۆیدا گوتی “ئەو ئامادەگی و پەرۆشییە بەدیناکەین لەلایەنەکانی دیکە بۆ ئەنجامدانی هەڵبژاردنەکان لەکاتی خۆیدا، بەتایبەت پارتی دیموکراتی کوردستان و یەکێتی نیشتمانی کوردستان”.
ناوبراو جەختی لەوەشکردوە، کە ئەوان وەكو بزووتنەوەی گۆڕان، پەیوەست دەبن بە پەیامەکەی خۆیانەوە، کە پێشتر رایانگەیاندووە، کە دەبێت هەڵبژاردنەکان لەکاتی خۆیدا بکرێت.
