نوچەنێت
بەرپرسی کاروباری دەرەوەی یەکێتیی ئەوروپا لەبارەی گشتپرسییەکەی باشووری کوردستان راگەیەندراوێکدا رایدەگەیەنێت، پشتیوانی گفتوگۆی نێوان هەولێر و بەغدا دەکەین. هەروەها ئامادەیی یەکێتی ئەوروپاش بۆ هاوکاریکردنی هەردوولا لەو بارەیەوە “ئەگەر داوایان لێبکرێت”، دەردەبڕێت.
رۆژی چوارشەممە 20-9-2017، فێدریکا مۆگرینی، بەرپرسی کاروباری دەرەوەی یەکێتیی ئەوروپا، لە راگەیێندراوێکیدا پشتیوانی یەکێتی ئەوروپای بۆ یەکپارچەیی و سەروەری عێراق دووپاتکردەوە.
مۆگێرینی لەبارەی گشتپرسییەکەی باشووری کوردستان رایگەیاندووە “ئەو گشتپرسییە بێ بەرهەم دەبێت و پێویستە خۆی لێ بپارێزرێت”.
بەرپرسی کاروباری دەرەوەی یەکێتیی ئەوروپا ئاماژەی بە کێشەکانی نێوان هەولێر و بەغدا کردوووە و دەڵێت، “ئێمە دان بەوە دەنێین، کە چەندین کێشەی هەڵپەسێردراو لە نێوان هەولێر و بەغدا هەیە، ئەوەش پێویستە بە رێگەی ئاشتی و دیالۆگی بەرهەمدار لەسەر بنەمای دەستووری عێراق چارەسەر بکرێن”.
فێدریکا مۆگێرێنی، پێشوازی لە دەستپێشخەری نوێنەری نەتەوە یەکگرتووەکانیش بۆ دیالۆگی نێوان هەولێر و بەغدا دەکات، هەروەها ئامادەیی یەکێتی ئەوروپاش بۆ هاوکاریکردنی هەردوولا لەو بارەیەوە “ئەگەر داوایان لێبکرێت”، دەردەبڕێت.
