نوچەنێت: تایبەت
لایەنە سیاسیەکانی باشوری کوردستان لە کەرکوك دەستان بە بانگەش بۆ پڕۆسەی گشتپرسی کرد و پۆلیسی قەزاو ناحیەکانی کەرکوكیش دڵنیایی دەداتە خەڵکی شارەکە و دەڵێت “ئەوەی لە تواناماندابێت دەیکەین بۆئەوەی پڕۆسەی گشتپرسی بەسەرکەوتویی بەڕێوەبچێت”.
لە لێدوانێکی تایبەت بە نوچەنێت، عەمید سەرحەد قادر، بەڕێوبەری پۆلیسی قەزا و ناحیەکانی کەرکوك، سەبارەت بە پلانە ئەمنیەکان بۆ پاراستی خەڵکی ناوچەکە لەکاتی بەڕێوەچوونی پڕۆسەی گشتپرسی لەو ناوچانە رایگەیاند: سەرجەم هێزە ئەمنیەکانی کەرکوك لەحاڵەتی ئامادەباشیدان بۆ پاراستنی سەروماڵی هاوڵاتیان و پارێزەری ئەوان دەبین، بۆیە ئەوەی لە تواناماندابێت، دەیکەین بۆئەوەی پڕۆسەی گشتپرسی بەسەرکەوتویی بەڕێوەبچێت، لەهەمان کاتدا پێویستیمان بە هەماهەنگی زیاترە بۆئەوەی هاوڵاتیان هاوکارمانبن و بەیەکەوە بتوانین ئەمنیەتی شارەکە بپارێزین.
سەرحەد قادر زیاتر گوتی “بەو پێیەی شاری کەرکوك جیاوازە لە پارێزگاکانی دیکە، بۆیە هێزە ئەمنیەکان شەو و رۆژیان خستووەتە سەریەك بۆ پاراستنی ئەمنیەتی شارەکە، بۆیە لەشەڕ و ململانێیەکی تونداین، ئێمە ئەمانەوێت ئاسایش بەرقەرار بکەین، بەڵام ئەوان ئەیانەوێت تێکیبدەن، بەتایبەتی داعش و ئەفکارە داعشیەکان”.
بەڕێوبەری پۆلیسی قەزا و ناحیەکانی کەرکوك هەروەها دەڵێت “داوا لە هاوڵاتیان دەکەین لە کاتی دەر بڕینی خۆشی و بانگەشە بۆ گشتپرسی بەئارامی بەڕێوەبچێت و بەرامبەراکانیان ئیستیفزاز نەکەن، چونکە کەرکوك شاری پێکەوە ژیان و برایەتیە، بۆئەوەی کەسانێك ئەو هەلە نەقۆزنەوە، کە بیانەوێت بارودۆخەکە تێکبدەن”.
