نوچەنێت
سكرتاریەتی ئەنجومەنی باڵای ریفراندۆم لە راگەیەندراوێكدا حەوت داواکاری ئاراستەی هاونیشتمانیان دەکات و داوا دەکات هاونیشتمانیان لە کاتی بانگەشەی گشتپرسی دووربكەوتنەوە لە بەكارهێنانی هێما و ئاڵا و رەمزی هەر لایەنێك یان وڵاتێك جگە لە ئاڵای كوردستان.
رۆژی چوارشەممە 13-9-2017، سكرتاریەتی ئەنجومەنی باڵای ریفراندۆم راگەیەندراوێکی بڵاوکردەوە و ئاماژەی بەوەداوە، بە مەبەستی زیاتر رێكخستنەوەی هەڵمەتی بانگەشەی ریفراندۆم و پابەندبوون بە بەها نیشتمانییەكان و رێكارە یاساییەكان، داوا لە هاووڵاتیانی كوردستان دەكات لە كاتی بانگەشەی رێفراندۆم رەچاوی ئەم خاڵانەی خوارەوە بكەن.
یەکەم: دووركەوتنەوە لە بەكارهێنانی هێما و ئاڵا و رەمزی هەر لایەنێك یان وڵاتێك جگە لە ئاڵای كوردستان.
دووەم: دووركەوتنەوە لە بەكارهێنانی ناو و وێنەی سیمبۆل و سەركردەكان وەكو پروپاگەندە یان بانگەشەی ریفراندۆم.
سێیەم: دووركەوتنەوە لە بێڕێزیكردن یان هێرش كردنەسەر سەركردە و ئاڵا و سیمبولی هەر لایەنێك یان وڵاتێك.
چوارەم: پاراستنی ئارامی شار و شارۆچكەكان و پاراستنی موڵكی گشتی.
پێنجەم: پاراستنی ئارامی هاوڵاتیان.
شەشەم: هاوكاری و هەماهەنگی لەگەڵ دەزگا ئەمنییەكان و پۆلیس و فەرمانگە حكومییەكان.
حەوت: جەخت دەكەینەوە لەسەر ئازادی رادەربڕین و رێگەدان بە ئەنجامدانی چالاكی و هەڵمەت و بانگەشەی ریفراندۆم بە ئازادی و بە شێوەیەكی شارستانی و ئاشتیانە، و بەپێی یاسا و رێنماییە كارپێكراوەكانی هەرێمی كوردستان و رێنماییەكانی كۆمسیۆنی باڵای سەربەخۆیی هەڵبژاردن و راپرسی.
