نوچەنێت-رووداو
کۆمپانیای داناگاز لەکاتی کردنەوەی بازاڕی بۆرسەی ئەبوزەبی، بەهای پشکەکانی بەرێژەی 14.1٪ بەرزبووەوە کە بەرزبوونەوەی ئەو پشکانەی بۆ رێککەوتنەکەی نێوان ئەو کۆمپانیایە و حکومەتی هەرێمی کوردستان دەگەڕێتەوە.
بە تەنیا دوای چەند خولەکێک لە کردنەوەی بازاڕی بۆرسەی ئەبوزەبی، بەهای پشکەکانی کۆمپانیای داناگاز بەرێژەیەکی بەرچاو بەرزبووەوە.
هەفتەی رابردوو ، کۆمپانیای داناگازی ئیماراتی لەگەڵ حکومەتی هەرێمی کوردستان گەیشتە رێککەوتنێک بۆ چارەسەرکردنی کێشە یاساییەکەی نێوانیان.
بەپێی ئەو رێککەوتنە، حکومەتی هەرێمی کوردستان بڕی 600 ملیۆن دۆلار دەستبەجێ دەداتە کۆمپانیای داناگاز و 400 ملیۆن دۆلاری دیکەی بۆ تەرخان دەکات بۆ ئەوەی لە کێڵگەکانی چەمچەماڵ و کۆرمۆر، ئاستی بەرهەمهێنانی گازی سرووشتی بە رێژەی سەدا 160 بەرزبکاتەوە بۆ رۆژانە 500 ملیۆن پێی سێجا.
حکومەتی هەرێمی کوردستان هەروەها پرسی حەقدەستە کەڵەکەبووەکانی لەگەڵ هەردوو کۆمپانیای گەنەل ئێنێرجی و دی ئێن ئۆی نەرویجی چارەسەرکرد و ئەو دوو کۆمپانیایە لە بڕی زیادکردنی پشکەکانیان لە کێڵگە نەوتییەکاندا، لە زیاتر لە یەک ملیار دۆلار قەرزی سەرشانی حکومەتی هەرێمی کوردستان خۆشبوون.
