نەوزاد عەلی چوچانی
ئەندامێکی ئەنجومەنی باڵای گشتپرسی رایدەگەیەنێت، لە کۆبوونەوەکەدا چۆنیەتی دیاریکردنی نەخشەرێگای داهاتوو، بۆ پشتیوانیکردنی گشتپرسی لەناوخۆ و دەرەوەی هەرێمی کوردستان دیاری دەکرێت.
رۆژی 8-7-2017 یەكەم كۆبوونەوەی ئەنجومەنی باڵای ریفراندۆم بە سەرپەرشتی مەسعود بارزانی، سەرۆكی هەرێمی كوردستان بەڕێوەچوو، لەو کۆبوونەوەیەدا سێ بڕیار درا، یەكێك لەو بڕیارانە، پابەندبوونی بەشداربووانی كۆبوونەوەكە بوو، بە بڕیار و راسپاردەكانی كۆبوونەوەی 7-6-2017، سەبارەت بە دیاریكردنی رۆژی 25ی ئەیلوول بۆ بەڕێوەچوونی ریفراندۆم لە هەرێمی كوردستان و ناوچە كوردستانییەكانی دەرەوەی ئیدارەی هەرێم، چارەسەركردنی پرۆسەی سیاسیی هەرێم و هەوڵدان بۆ باشتركردنی بژێوی ژیانی خەڵك.
لە لێدوانێکی تایبەت بە نوچەنێت، د. عەبدوڵڵا وەرتێ، ئەندامی ئەنجومەنی باڵای گشتپرسی هەرێمی کوردستان رایگەیاند: بڕیارە سبەینێ یەكشەممە 30-7-2017، ئەنجومەنی باڵای گشتپرسی هەرێم کۆببێتەوە، ئەجێندای کۆبوونەوەکەش، تایبەت دەبێت بە چۆنیەتی دیاریکردنی نەخشەڕێگای داهاتوو، بۆ پشتیوانیکردنی گشتپرسی لەناوخۆ و دەرەوەی هەرێمی کوردستان.
د. عەبدوڵڵا وەرتێ گوتیشی “لە کۆبوونەوەکەدا گفتوگۆ لەسەر ئەوپرسانە دەکرێت، کە پەیوەندیان بە بارودۆخی سیاسی هەرێمی کوردستان و ناوچەکە، هێزە سیاسییەکان، کاراکردنەوەی پەرلەمان و بژێوی ژیانی خەڵکەوە هەیە”.
ئەندامەکەی ئەنجومەنی باڵای گشتپرسی دەڵێت “یەکێکیتر لەو تەوەرانەی، کە گفتوگۆی لەسەر دەکرێت، درووستکردنی کۆدەنگی نیشتمانییە بۆ ئەو پرس و هەڵوێستانەی، کە وڵاتانی بیانی لەسەر پرسی گشتپرسی هەیان بووە”.
ناوبراو جەختی لەوەشکردەوە، ئەو لایەنانەی، کە پێشتر بەشداری کۆبوونەوەی ئەنجومەنەکەیانکردبوو، بەشداری کۆبوونەوەکەی سبەینێ دەکەن.
