نوچەنێت
حەیدەر عەبادی فەرمانی پێدانی زەوی نیشتەجێبوون بە خانەوادەی شەهیدان و کەمئەندامانی پێشمەرگە، هێزە ئەمنییەکان و حەشدی شەعبی لە شەڕی داعشدا دەردەکات.
لە شەڕی سێ ساڵەی داعشدا هێزەکانی پێشمەرگە زیاتر لە هەزار و 700 شەهید و زیاتر لە 10 هەزار برینداریان داون، بەشێک لە بریندارەکانیش بەهۆی قورسی برینەکانیان کەمئەندام بوون.
بەپێی بەیاننامەیەکی نوسینگەی سەرۆکوەزیرانی عێراق، حەیدەر عەبادی، سەرۆکوەزیران و فەرماندەی گشتی هێزە چەکدارەکانی عێراق، بە فەرمانێکی دیوانی بڕیاری داوە پارچەیەک زەوی نیشتەجێبوون بە خانەوادەی شەهیدان و کەمئەندامانی شەڕی دژی داعشدا لە هێزەکانی پێشمەرگە، هێزە ئەمنییەکان، حەشدی شەعبی، حەشدی هۆزەکان و خۆبەخشەکان بدرێت.
عەبادی هەریەک لە وەزارەتەکانی دارایی، ئاوەدانکردنەوە و نیشتەجێکردن، شارەوانی، ئەمیندارییەتی بەغدا و حکومەتە خۆجێیەکان رادەسپێرێت بۆ هەر یەکێکیان لە سنووری شارەوانییەکاندا، پارچە زەوییەکی نیشتەجێبوون بە رووبەری 200 مەتر چوارگۆشە تەرخان بکەن.
