نوچەنێت-باس
سەرۆکی کۆمسیۆنی باڵای سەربەخۆی هەڵبژاردن و راپرسی رایدەگەیەنێت، لە کۆتایی ئەم مانگەوە تیمێکی ئەمریکی لە ئاستی باڵا بۆ پرسی چاودێریکردنی ریفراندۆم بۆ سەربەخۆیی دەگایە کوردستان.
هەندرێن محەمەد، سەرۆکی کۆمسیۆنی باڵای سەربەخۆی هەڵبژاردن و راپرسی لە هەریمی کوردستان گوتیشی ”ئەو تیمە لە بواری پڕۆسەی هەڵبژاردن و رێکخراوە دیموکراسییەکاندا کار دەکەن، هەروەها چاودێریی پڕۆسەی ریفراندۆم و هەڵبژاردن و رێکارەکانی پڕۆسەکە دەکەن، هەر بۆیەش ماوەیەک پێش پڕۆسەکە دێنە کوردستان“.
ئەو بەرپرسەی کۆمسیۆن ئاماژەی بەوەش دا، ئەو تیمە باوەڕپێکراوی جیهانییە و لە زۆر وڵاتدا چاودێریی پڕۆسەی ریفراندۆم و هەڵبژاردنیان کردووە، گوتیشی ”دوای پڕۆسەی ریفراندۆم و هەڵبژاردن، ئەو تیمە راپۆرتی خۆی لەسەر چۆنیەتیی ئەنجامدانی پڕۆسەکە بڵاو دەکاتەوە، کە راپۆرتەکانیان قورسایی نێودەوڵەتییان هەیە، ئەگەر بێت و بە شێوەیەکی ئەرێنی باس لە چۆنیەتیی ئەنجامدانی پڕۆسەکە بکەن، ئەوا راپۆرتەکانیان کاریگەرییان دەبێت بۆ دانپێدانانی نێودەوڵەتی بە ئەنجامدانی پرۆسەکە، چونکە ئەو تیمە بڕواپێکراوی جیهانین، کە لەو بوارەدا کار دەکەن و پێشتر هەڵسەنگاندن بۆ کارەکانیان کراوە“.
هەندرێن محەمەد جەختی لەسەر ئەوەش کردەوە، پڕۆسەی ریفراندۆم لە هەرێمی کوردستان بە پێوەری نێودەوڵەتی بەڕێوە دەچێت و پێشبینیی هاتنی تیمی دیکەی وڵاتانی دیکەش دەکەن گوتی ”بەپێی ئەو بڕیارانەی بەدەست ئێمە گەیشتوون، لە ئاستی باڵادا تیمی دیکەش لە وڵاتانی جیاجیای ئەوروپایی و جیهانی بۆ چاودێرییکردنی پڕۆسەکە دێنە کوردستان، بەڵام زۆربەیان لە ناوەڕاستی مانگی هەشت و سەرەتای مانگی 9دا، کە پڕۆسەکەی تیادا ئەنجام دەدرێت، دەگەنە کوردستان“.
