ڕێبوار ئالانی : پێکی پاییز
لەگەڵ گەڵای ئەم پاییزە عومرم هێواش هێواش وەری
لە ناو ناخی یادگاریما بەدیم نەکرد بەختەوەری
لە چاوەڕوانی ئەم عەشقە من هیچ شەوانێ نەسرەوتم
لە ناو سەحرای ئەوینی تۆ بەجێژوانی غەم سەرکەوتم
هەوری قەدەر چاوەڕێتە لە کوێستانی خەم و ناڵە
گەڕانەوەم بۆ ژوانی تۆ خەونێکی پڕ تەم و تاڵە
ڕۆژێ دادێ بەم حوزنەوە جلێکی ڕەش باڵا پۆشی
لەگەڵ ئاهی هەناسەما پێکی پایزان بنۆشی
تازە چرۆی عومری پاییز دێتە باخی گوڵی وەریو
هەستت ناسۆری دەڕێژێ بۆ کانیاوی بەهاری زیو